Որեւէ մեկը չփորձի դանակ խաղացնել, գողական խաղացնել ՀՀ-ում․ ոչ միայն ասֆալտին կփռենք, այլեւ պատերով կտանք․ վարչապետ

Զարթոնք գյուղի հայտնի միջադեպից հետո մենք մտածում ենք, որ կարող է՝ մենք շատ լիբերալ ենք, կարող է՝ տեղ կա, որ պետք է ասենք՝ սենց չեղավ, միջամտենք եւ լուծումներ գտնենք։

Այս մասին այսօր ԱԺ-կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը։

«Բոլոր նրանք, ովքեր կփորձեն բռնությամբ հարց լուծել, բանտում են հայտնվելու։ Տարբերակ չունեն։ Որեւէ մեկը հանկարծ չփորձի Հայաստանում դանակ, զենք խաղացնել։ Կներեք, էլի կրկնեմ՝ ոչ միայն ասֆալտին կփռենք, այլեւ պատերով կտանք։

Որեւէ մեկը հանկարծ չփորձի դանակով հարց լուծել։ Եթե նույնիսկ միջադեպեր կլինեն, որ ինչ-որ մարդիկ, ինչ-որ կապեր օգտագործելով՝ կպլստան այս մի քրեական գործից, մեկ է՝ հաջորդ պահին վզներից բռնելու ենք։ Որեւէ մեկը չփորձի դանակ խաղացնել, գողական խաղացնել Հայաստանի Հանրապետությունում»,-ասաց ՀՀ վարչապետը։

Ավելի վաղ հայտնել էինք, որ Արմավիրի Զարթոնք համայնքում օրեր առաջ միջադեպ է տեղի ունեցել, որի ժամանակ հնչել են կրակոցներ։ Միջադեպը տեղի է ունեցել համայնքի ղեկավարի հրաժարականի պահանջով բողոքի ակցիայի ժամանակ։

Դեպքի առթիվ ՀՀ ՔԿ Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի  258-րդ հոդվածի 4-րդ մասի հատկանիշներով: Կա երկու ձերբակալված։

(Visited 26 times, 1 visits today)